იტალიური “სასუოლოს” ახალგაზრდა შემტევი დომენიკო ბერარდი სერია A-ს რეკორდსმენი გახდა. საქმე ისაა, რომ 1994-1995 წლების სეზონიდან მოყოლებული, დომენიკო პირველი ფეხბურთელია, რომელმაც იტალიის ელიტარულ ლიგაში 22 წლის ასაკში 40 გოლის გატანა მოასწრო. აღნიშნულ ციფრს, ბერარდიმ გუშინ, “პესკარასთან” მატჩში მიაღწია.

ბერარდის დებიუტი კალჩოში 2013-2014 წლების სეზონში ჰქონდა, როდესაც 29 მატჩში 16 გოლის გატანა მოახერხა. ერთი წლის მერე დომენიკოს შედეგი 32 შეხვედრაში 15 გოლი იყო, ხოლო შარშან 29 თამაშში თავი შვიდჯერ გამოიჩინა.

რაც შეეხება მიმდინარე სეზონს, იგი ნიჭიერმა იტალიელმა ჩინებულად დაიწყო: სერია A-ს ორ ტურში ამდენივე გოლი შეაგდო და ამასთან, ევროპა ლიგის 4 მატჩში მეტოქეები 5-ჯერ დაამწუხრა. აღსანიშნავია, რომ დომენიკო ბერარდი 2014 წლიდან მოყოლებული ყველაზე შედეგიანი იტალიელი ფეხბურთელია...