საქართველოს 20-წლამდე კალათბურთელთა ნაკრებს, რომელმაც ევროპის ჩემპიონატის B დივიზიონში ჯგუფური ეტაპი იოლად დაძლია, მეოთხედფინალში ხელი მოეცარა.

ნიკოლოზ ჩერქეზიშვილის, გიორგი ნიკოლაძისა და დიმიტრი ჟაკობოვის გაწვრთნილმა გუნდმა ისლანდიას წინააღმდეგობა ვერ გაუწია და დიდი სხვაობით – 54:94 დამარცხდა.

მატჩის ბედი ფაქტობრივად პირველ მეოთხედში გადაწყდა, რომელიც ჩრდილოელებმა 29:5 მოიგეს. კუნძულელებს ყველაფერი გამოსდიოდათ, ქართველებს კი – თითქმის არაფერი. შორი სროლები – ეს იყო ისლანდიელთა ძირითადი იარაღი, რომელსაც ქართველებმა ვერაფერი მოუხერხეს.

ქართველებმა ყველაზე უკეთესად მეორე პერიოდი ჩაატარეს, რომელიც 19:16 მოიგეს, თუმცა დიდი შესვენების შემდეგ, ისლანდიელებმა ისევ იძალეს და საბოლოოდ, ქართველებს სოლიდური მარცხი აგემეს.

საქართველოს ნაკრებში 100 ქულის ზღვარს მაიზერ რევაზაშვილი (14 ქულა) და გიორგი ტურძილაძე (12) ასცდნენ. ისლანდიელთაგან კი ეს ერთბაშად ექვსმა კალათბურთელმა მოახერხა.

საქართველოს მომდევნო მეტოქე ბოსნია-ჰერცეგოვინა იქნება, რომელსაც 23 ივლისს, თბილისის დროით 22:00 საათზე დავუპირისპირდებით. მოგებული მეორე დღეს მე-5 ადგილისთვის ითამაშებს, წაგებული კი – მე-7 ადგილისთვის.

ევროპის U20 ჩემპიონატი. B დივიზიონი. ხალკიდა, საბერძნეთი

ისლანდია – საქართველო 94:54 (29:5, 16:19, 20:12, 29:18)

www.gbf.ge