ესპანეთის სეგუნდა დივიზიონში გიორგი აბურჯანიას “ხიმნასტიკმა” 0:2 წააგო სტუმრად “უესკასთან” და მეოთხე ადგილზეა. აბურჯანია სასტარტოში იყო და 71-ე წუთზე შეცვალეს. “ხიმნასტიკს” პრიმერაში პირდაპირ გადასვლის შანსი აქვს, თუმცა შესაძლოა, ფლეი-ოფში მოუწიოს ბრძოლა.
ბელარუსის ჩემპიონატში ვალერიან გვილიას “მინსკმა” შინ 3:0 სძლია “ბრესტს” და მეორე ადგილზეა. გვილიამ ლამაზი საჯარიმო დარტყმით გაიტანა გოლი. ის სასტარტოში იყო და 64-ე წუთზე შეცვალეს. შეგახსენებთ, გვილიამ მარტში საქართველოს 21-წლამდელთა ნაკრებში ითამაშა.
უკრაინაში “ზორიამ” შინ 1:2 წააგო “დნიპროსთან”. ეს გუნდები, შესაბამისად, მესამე და მეოთხე ადგილზე არიან. ქართველებს არ უთამაშიათ: არც ჯაბა ლიპარტიას და არც – სანდრო კობახიძეს.
“კარპატიმ” შინ 2:2 დაასრულა მატჩი “ოლექსანდრიასთან”. ლვოველები მეშვიდეზე არიან, ხოლო “ოლექსანდრია” – მეშვიდეზე. ბუბა დაუშვილმა “კარპატიში” შეუცვლელად ითამაშა და საგოლე პასიც გააკეთა. სტუმართა შორის კი დავით თარგამაძე ვერ გამოვიდოდა მინდორზე, რადგან ტრავმირებულია.
რუსეთში “სპარტაკმა” შინ 2:2 ითამშა “ყუბანთან” და მეშვიდეზეა. ჯანო ანანიძე განაცხადში არ ყოფილა, რადგან ვირუსი ჰქონდა და ბოლო დღეებში ინდივიდუალურად ვარჯიშობდა.
კვიპროსზე, აუტსაიდერმა “ეთნიკოსმა” 3:0 სძლია ბოლოსწინაადგილოსან “პაფოსს”. “ეთნიკოსში” სრულად ითამაშა ელგუჯა გრიგალაშვილმა, მისი ძმა შოთა 70-ე წუთზე შეცვალეს, ხოლო რევაზ ბარაბაძე სათადარიგო იყო. “პაფოსში” 90 წუთი გაისარჯა ლევან ხმალაძე.