ქართველ ლეგიონერთა ამბები რუსეთის პრემიერლიგით დავიწყოთ: სოლომონ კვირკველიამ შეუცვლელად ითამაშა “რუბინი”-“ყუბანის” შეხვედრაში, რომელიც ყაზანელებმა 1:0 მოიგეს და ცხრილის შუაში, მეცხრე ადგილზე არიან. საკმაოდ კარგად გაისარჯა კვირკველია, საიმედო გახლდათ.

გიორგი ლორიას ”კრილიამ” შინ 0:1 წააგო “როსტოვთან”, რომლის განაცხადში იყო ნიკა კაჭარავა, მაგრამ არ უთამაშია. ლორია კი ბრწყინვალე იყო რამდენიმე ეპიზოდში, განსაკუთრებით ეს ითქმის პირველ ტაიმზე. “კრილია” მე-12 (ბოლოდან მეხუთე) პოზიციაზეა, ხოლო როსტოველები მეორეზე.

უკრაინულ პრემიერლიგაში დავით თარგამაძის “ოლექსანდრიამ” სტუმრად ქულა აიღო “სტალთან” (2:2) და მეექვსე საფეხურზეა. თარგამაძემ სრულად ითამაშა, აქტიური იყო, ერთ საგოლე კომბინაციაში მიიღო მონაწილეობა და მოგვიანებით ძელს მოარტყა ბურთი.

თურქეთის სუპერლიგაში კარგა ხნის შესვენების შემდეგ გამოჩნდა ნიკა ძალამიძე. “რიზესფორის” ქართველმა შემტევმა ბოლო 8 წუთი ითამაშა “ბურსასფორის” წინააღმდეგ. ძალამიძის გუნდმა 0:1 წააგო და მე-12 ადგილზეა.

ზაურ სვანაძის გაწვრთნილმა “ინტერმა” აზერბაიჯანის ჩემპიონატში 1:0 იმარჯვა – სტუმრად “სუმგაითთან”. სასტარტოში იყვნენ და ბოლომდე ითამაშეს ლაშა სალუქვაძემ, ზურაბ ხიზანიშვილმა და ნიკა კვეკვესკირმა. “ინტერი” მეოთხე ადგილზეა.

პორტუგალიის რანგით მეორე ლიგაში ავთო ებრალიძის “ჟილ ვისენტემ” შინ 2:0 სძლია “ლეიშოეშს” და მეექვსე პოზიციაზეა, თუმცა უმაღლესში გადასვლის ნორმალური შანსი აქვს. ებრალიძემ 77-ე წუთამდე ითამაშა.

მესამე ბუნდესლიგაში გიორგი პაპუნაშვილს არ უთამაშია. ის ვერ დაეხმარა “ვერდერის” 23-წლამდელებს: გერმანული ვეზერ-კურიერის ცნობით, პაპუნაშვილს მცირე ტრავმა აწუხებს. ბრემენელებმა “ვურცბურგერ კიკერსთან” 1:1 დაასრულეს.