იტალიის ჩემპიონ ტურინის “იუვენტუსს” ძირითადი შემადგენლობის ორი წევრი ალექს სანდრო და ჯორჯო კიელინი უბრუნდება. ავტორიტეტული გამოცემა “გაძეტა დელო სპორტის” ინფორმაციით, ორივე ზემოხსენებული ფეხბურთელი დამდეგ კვირას, იტალიის სერია A-ს ცენტრალურ მატჩში მილანის “ინტერის” წინააღმდეგ თამაშს შეძლებს.

მოგეხსენებათ, კიელინისა და სანდროს ჩემპიონთა ლიგაზე მიუნხენის “ბაიერნთან” პირველი მატჩი გაუცდათ, თუმცა 16 მარტს საპასუხო შეხვედრაში დიდი ალბათობით საკუთარი გუნდის დახმარებას შეძლებენ.

თუ იტალიელი და ბრაზილიელი მცველები გამოჯანმრთელდნენ, ლაზარეთს ნახევარმცველი კლაუდიო მარკიზიო შეუერთდა. ჯერჯერობით უცნობია, რა პერიოდი გაუცდება 29 წლის ფეხბურთელს, თუმცა “ინტერთან” მისი თამაში გამორიცხულია. შეგახსენებთ, მარკიზიო “ბაიერნთან” მატჩში ძირითად შემადგენლობაში იმყოფებოდა, მაგრამ მეორე ტაიმში მოედანზე აღარ გამოჩენილა.