ფეხბურთი

14:41 | 8.02.2016 | ნანახია [] - ჯერ

გიორგი აბურჯანია: “გახარებული ვარ, მაგრამ უკვე მომავალ თამაშზე ვფიქრობ”

ტარაგონას “ხიმნასტიკის” ძირითად შემადგენლობაში გიორგი აბურჯანია გუშინ პირველად გამოჩნდა. “ჟირონას” წინააღმდეგ (1:1) გიორგიმ მოედანზე 90 წუთი დაჰყო და თავისი გუნდის გატანილ გოლში ლომის წილი დაიდო – საგოლე პასი მის ანგარიშზეა (VIDEO).

როგორც worldsport.ge-ს აბურჯანიამ უთხრა, წარსულზე არ ფიქრობს და თავში მხოლოდ მომდევნო თამაში უტრიალებს:

“მოსაგები თამაში გვქონდა, თუმცა ჩვენი მომენტები ვერ გამოვიყენეთ და გოლიც პენალტიდან გავუშვით. იყო თუ არა დასანიშნი თერთმეტრიანი ვერ გეტყვით, რადგან ჩემი პოზიციიდან კარგად არ ჩანდა. საწყენია, რომ გამარჯვება ვერ მოვახერხეთ, არადა, მესამე ადგილზე გადასვლის კარგი შანსი გვქონდა.

რა თქმა უნდა, გახარებული ვარ კარგი თამაშით. თუმცა უკვე ახალი დღე დაიწყო და მეც გადავერთე ავტომატურად შემდეგ მატჩზე.

მთავარმა მწვრთნელმა ვისენტე მორენომ კარგი თამაში მომილოცა, მეტი არაფერი უთქვამს. ოთხშაბათს, დეტალურად გაარჩევენ გუნდის თამაშს და გვაჩვენებს რა იყო კარგი და რა - ცუდი.

საგოლე პასს რაც შეეხება, ბურთს სანამ მივიღებდი, უკვე შემჩნეული მქონდა მოედნის ცენტრში დიდი ზონა და მეც დავიძარი ბურთიანად. მერე თავისუფალი თანაგუნდელი დავინახე... ეგ იყო და ეგ", - გვითხრა აბურჯანიამ.

შეგახსენებთ, გიორგი აბურჯანია ესპანეთში ფამაგუსტას “ანორთოსისიდან” ერთი თვის წინ გადაბარგდა და ახალი გუნდის ღირსება აქამდე ორჯერ დაიცვა. ესპანურ მედიაში გავრცელებული ინფორმაციით, “ნასტიკს” გიორგის ტრანსფერი 150 ათასი ევრო დაუჯდა.

0.129605