ფეხბურთი

23:13 | 25.09.2015 | ნანახია [] - ჯერ

გადადექით - კვარაცხელიამ ფედერაციას წითელი ბარათი უჩვენა

უკრაინაში გამგზავრებამდე (შახტარი- პარი სენ ჟერმენის მატჩზე) სფფ-ს პრეზიდენტობის კანდიდატმა მამუკა კვარაცხელიამ მორიგი პრესკონფერენცია გამართა და ფეხბურთის ფედერაციასა და მის აღმასკომს გადადგომისკენ ორიგინალურად მოუწოდა:

“დღე არ გავა ამ “დაღმასკომმა” სიურპრიზი რომ არ შემოგვთავაზოს. საერთოდ სად არიან, რა უნდათ, მე მგონი თვითონ დაავიწყდათ... ერთი კი ფაქტია, ფედერაციის სათავეში დარჩენა უნდათ, რას არ კადრულობენ ამისთვის... საკუთარ იურისტსაც, კესო ჩხიკვაძესაც აღარ ენდობიან და იმასაც კი აღარ ეუბნებიან, რომ აღმასკომის სხდომას დაესწროს! ამ დროს მოჰყავთ მეორე იურისტი, გიორგი ანთაძე, რომელზეც ქალბატონი ჩხიკვაძე ამბობს: უი გამახსენდა ეს ბიჭი, კალათბურთის სფეროში მუშაობდა და ხანდახან რჩევებს მეკითხებოდა ფეხბურთზეო, ხელშეკრულება კი არა აქვს ფედერაციასთანო... ახლა ადგა „დაღმასკომი“ და ტრიბუნალის ხელმძღვანელი ზურაბ ბიწაძე გაათავისუფლა - როგორ გაბედე და სწორი გადაწყვეტილება მიიღეო! მოკლედ, ეს ყველაფერი უნდა გადაიღო და მაგარი კომედია გამოვა.”

-პრესკონფერენციაზე მოწვევის წინ გვითხარით, რომ კიდევ ერთი სენსაციური სიახლე უნდა გეცნობებინათ..

-ფედერაციაში საკუთარი ეთიკის კოდექსს რომ ლამის ტუალეტის ქაღალდივით ეპყრობიან, არაერთხელ მოგახსენეთ, გაოცებული ვიყავი, ასე რამ აცრა ეთიკაზე-მეთქი და აი, შევიტყვე - ფედერაციის პრეზიდენტმა და გენერალურმა მდივანმა უეფას ეთიკისა და სადისციპლინო ინსპექტორად არც მეტი არც ნაკლები ნოდარ ახალკაცი უმცროსი წარუდგინა! წარმოგიდგენიათ, ქართული ფეხბურთის დამაქცევარი, ქართულ ფეხბურთში მილიონების დამკარგავი უმცროსი ახალკაცი ფედერაციის ამ ხელმძღვანელობამ უეფაში წარადგინა 4 წლით!!! მეტი მოღვაწე ვერ იშოვეს ქართულ ფეხბურთში!!! სიჭინავა არ იყო, ახლად ფეხშედგმული ფედერაციის შენობაში რომ გაჰკიოდა - 18 მილიონი ლარი დამხვდა ვალი ახალკაცის ხელმძღვანელობის გამოო?! რა მოხდა, რატომ შეიცვალა დამოკიდებულება? რაიმე ხომ არ იმალება ამაში? რამე ხომ არ იცის ისეთი ახალკაცმა დღევანდელი ფედერაციის ხელმძღვანელებზე? აბა რა უნდა იფიქრო სხვა?

-კოკაიას ფეხბურთიდან მოკვეთაზე რას იტყვით?

-საოცარია როცა „დაღმასკომი“ ჩივაძეზე მეტი ჩივაძე აღმოჩნდა. ბატონმა საშამ ღირსეულად გადაიტანა შეურაცხყოფა და ხმა არ მიუცია კოკაიას წინააღმდეგ და „დაღმასკომმა“ კი ამხელა ინვესტორი მოკვეთა ქართული ფეხბურთიდან! მალე „დაღმასკომელები“ თვითონ დარჩებიან მარტო ფედერაციის შენობაში და დარბაზის, ანაც ოთახის ფეხბურთს ითამაშებენ... ბატონ ილოს კი მივმართავ - 4 ოქტომბერს ოფიციალურად აღგიდგებათ ქართულ ფეხბურთში მოღვაწეობის მანდატი, ბატონ საშასთან კი თავად გაარკვიეთ ურთიერთობა...

სფფ-ს პრეზიდენტობის კანდიდატმა საუბრის დასრულების შემდეგ საკუთარი ხელით გვაჩვენა თერთმეტი ფურცელი, რომელზეც თერთმეტი მიზეზი ეწერა ფედერაციის და ფედერაციის აღმასკომის დანაშაულებისა, ფურცლები მეორე მხარით მიაკრა კედელს - გადადექით! -გამოისახა კედელზე, კვარაცხელიამ კი წითელი ბარათი ააფრიალა.

0.140906