ეროვნული გუნდის თავკაცის კახა ცხადაძის მთავარი ამოცანა თამაშის “დალაგებაა”. ამის შესახებ მან საქართველოს ფეხბურთის ფედერაციის ვებგვერდთან საუბრისას თქვა:

“ჩვენი მთავარი ამოცანაა, რომ თამაში “დავალაგოთ”. რაც შეეხება ფეხბურთელებს, არის მცირე პრობლემები და იმედია, ეს ყველაფერი მომზადებაში ხელს არ შეგვიშლის, რადგან უახლოესი ორი მატჩისთვის სეზონის დასრულების შემდეგ სრულყოფილი სავარჯიშო პროცესი ძალიან მნიშვნელოვანია.

ავსტრიაში არაჩვეულებრივი პირობებია. მინდორი საკმაოდ მაღალი ხარისხისაა და გუნდს ყველა პირობა აქვს, რომ შეხვედრებისთვის კარგად მოემზადოს. სრულყოფილი ტაქტიკური ვარჯიშებისთვის აუცილებელია, რომ გუნდში გამოძახებული თითოეული ფეხბურთელი ჯანმრთელად იყოს და სრულფასოვანი საწვრთნელი პროცესი წარიმართოს. ფუნქციონალურად ვინც ყველაზე კარგ მდგომარეობაში იქნება მომავალ მატჩებში ის ითამაშებს”.

გოგიტა გოგუას საქართველოს ფეხბურთელთა ეროვნულ ნაკრებში დაბრუნება ახარებს.

“ძალიან სასიხარულოა, რომ ოთხი წლის შემდეგ ნაკრებში დავბრუნდი. მადლობა კახა ცხადაძეს, რომ კვლავ გუნდთან ერთად ყოფნის საშუალება მომცა. ნაკრებში საკმაოდ კარგი მდგომარეობაა. ყველა პირობაა შექმნილი, რომ გუნდი უახლოესი ორი მატჩისთვის კარგად მოემზადოს” – განაცხადა გოგუამ, რომელიც 2011 წლის მარტის შემდეგ, ნაკრებში პირველად გამოიძახეს. მაშინ, მან გუნდი ყოფილ მთავარ მწვრთნელ თემურ ქეცბაიასთან კონფლიქტის გამო დატოვა.

საქართველოს ეროვნული ნაკრები უკრაინასთან 9 ივნისს ლინცში დანიშნული ამხანაგური მატჩისთვის და 13 ივნისს პოლონეთთან ვარშავაში გასამართი ევროშესარჩევის შეხვედრისთვის ავსტრიაში ემზადება.