როგორც "მსოფლიო სპორტმა" შეიტყო, ორშაბათს "ზესტაფონის" ქომაგები აქციას გამართავენ. მათი მოთხოვნაა, რომ კლუბს სახელმწიფოსგან დაფინანსება ჰქონდეს. ანუ პოზიცია ასეთია: "თუ გორის "დილას" აფინანსებენ, "ზესტაფონმა" რა დააშავა?!"
"ზესტაფონს" ახლა არ ულხინს: კლუბში ბოლო თვის ხელფასები არ გაცემულა - არც ფეხბურთელებს აუღიათ და არც კლუბის რომელიმე სხვა პერსონალს.
მიმდინარე სეზონს თუ არ ჩავთვლით, საფეხბურთო კლუბი "ზესტაფონი" დაარსების დღიდან ერთ-ერთი საუკეთესო იყო ჩემპიონატში, ლიდერებს შორის გახლდათ და ორჯერ საქართველოს ჩემპიონიც გახდა.
...აქციის გამართვაზე ინფორმაცია თავად ქომაგებისგან შევიტყვეთ, მათ შორის, "ზესტაფონის" ფან-კლუბის ლიდერ კოტე ბოჭორიშვილისგან. კლუბის ხელმძღვანელობაში ამის შესახებ არაფერი უთქვამთ. ქომაგების მოთხოვნაა, რომ აქცის დროს ზესტაფონში ჩამოვიდნენ და სიტუაციას გაეცნონ სპორტისა და ახალგაზრდობის საქმეთა მინისტრი ლევან ყიფიანი, საქართველოს ფეხბურთის ფედერაციის პრეზიდენტი ზვიად სიჭინავა...
ზოგადად, "ზესტაფონის" პოზიცია გასაგებია და ეს ილია კოკაიამ დააფიქსირა:
"უსამართლობაა, ერთ კლუბს 9 მილიონი მისცე, სხვებს ნაკლები, კერძო კლუბები კი მშრალზე დატოვო".
კოკაია თანაბრობის პრინციპზე საუბრობს - თუ სახელმწიფო უნდა იყოს ფეხბურთში, მაშინ ყველა კლუბი ერთნაირად დააფინანსოს, თუ არადა, ყველა კლუბს კერძო ინვესტორი მოუძებნონ. თუ არც ერთი იქნება და არც მეორე? ამ შემთხვევაში კოკაიას პოზიცია ასეთია: "გუნდს დავშლი".
ასევე გასაგებია პოზიცია: თუ სახელმწიფო A კლუბს მეტს აძლევს და B-ს ნაკლებს (ან საერთოდ არაფერს), A კლუბის შედეგით იქნება დაინტერესებული.
