საქართველოს ვაჟ ჩოგბურთელთა ნაკრებმა დევისის თასის ევრ-აფრიკული III ზონის C ჯგუფში ასპარეზობა სომხებზე დამაჯერებელი გამარჯვებით დაიწყო. ვიქტორ ბაქშის შეგირდებმა მეზობელთა გუნდს შანსი არ დაუტოვეს და 3:0 სძლიეს.

შეგახსენებთ, რომ აღნიშნული დონის შეჯიბრს სან მარინოს თიხის კორტები მასპინძლობს და პლეი-ოფში გასასვლელად ჯგუფში პირველი ადგილის დაკავებაა საჭირო. საქართველოს ნაკრებს მე-2 მატჩი სწორედ მასპინძელთა გუნდთან ელის და თუკი იქაც წარმატებას მიაღწია, საწყისი მისია შესრულებული იქნება.

თუკი ისევ გასულ შეხვედრას დავუბრუნდებით, აღვნიშნავთ, რომ ქართველ ჩოგბურთელებს არცერთი სეტი არ წაუგიათ. გიორგი ცივაძემ ხაჩატურ ხაჩატრიანს 6:1, 7:5 სძლია, ალექსანდრე მეტრეველმა აშოტ გევორქიანს 7:6 (7:0), 6:2 მოუგო, ბოლოს კი ცივაძემ და მეტრეველმა წყვილებში ხაჩატურ და სედრაკ ხაჩატრიანები 6:2, 6:0 დაამარცხეს.

საინტერესოა, რომ როგორც სომხეთის ასევე ჩვენი მომავალი მეტოქეს სან-მარინოს გუნდებს პროფესიონალ ჩოგბურთელთა ასოციაციის (ATP) რეიტინგში არცერთი მოთამაშე არ ჰყავთ. საქართველოს ნაკრებში ურეიტინგო მხოლოდ შოთა მეფარიძეა, მეტრეველი 965-ეა, ხოლო ცივაძე – 1553-ე.

დასასრულ, სხვა ჯგუფების მატჩებზეც ვთქვათ. ჩვენთვის ყველაზე საინტერესო შეხვედრა A პულში შედგა, სადაც საბერძნეთმა ჩერნოგორიას 3:0 მოუგო და ვინაიდან ლიხტენშტეინს კიდევ უფრო სუსტი ნაკრები ჰყავს, დიდი ალბათობით, პირველი ადგილიც გაინაღდა. ამდენად, თუკი C ჯგუფში საქართველომ იმარჯვა, პლეი-ოფში სავარაუდო მეტოქედ სწორედ საბერძნეთი ეყოლება.

B ჯგუფში ნორვეგიამ მალტას 3:0 სძლია, D-ში კი, სადაც 4 გუნდი მოხვდა, ასეთი შედეგები დაფიქსირდა: მაკედონია-თურქეთი 3:0, ალბანეთი-აზერბაიჯანი 3:0.