2015 წლის ევროპის ჩემპიონატის შესარჩევ ციკლში საქართველოს საკალათბურთო ნაკრების მეტოქეები პორტუგალია და უნგრეთი საკონტროლო მატჩებს მართავენ და ამჯერად, ავსტრიაში ჩატარებულ ტურნირში მონაწილეობა ერთად მიიღეს.

შეგახსენებთ, რომ მანამდე პორტუგალიელებმა გერმანიასთან 2 სპარინგ-შეხვედრა დათმეს – 66:77 და 56:86, ავსტრიაში კი სამივე თამაში მოიგეს და ობერვარტის ტურნირის ჩემპიონებიც გახდნენ.

პირენეელებმა უნგრეთს 76:70 სძლიეს, ავსტრია 70:62 დაამარცხეს, ხოლო ბულგარეთს 80:74 აჯობეს.

კარგად ითამაშა უნგრეთმაც, რომელმაც შინაურ კედლებში დანიელთა დამარცხების (65:47) კვალად, ავსტრიაში ორ მატჩში იმარჯვა. უნგრელებმა პორტუგალიასთან წაფორხილების კვალად, ბულგარეთს (71:63) და ავსტრიას (66:65) აჯობეს.

შეგახსენებთ, რომ ათიოდ დღის წინ მაკედონიის ტურნირზე ავსტრიელებს საქართველოს ეროვნული ნაკრებიც დაუპირისპირდა და მათი დამარცხება მხოლოდ ოვერტაიმში მოახერხა – 78:74.

შესარჩევი ტურნირის დაწყებამდე პორტუგალიელებს და უნგრელებს თითო-თითო ტურნირი ელით. პორტუგალიელები მომავალი თვის დასაწყისში პოლონურ ტორუნს ესტუმრებიან და 1-3 აგვისტოს მასპინძლებს, ირანს და შვედეთს გაეჯიბრებიან.

თავის მხრივ, 31 ივლისიდან 4 აგვისტომდე პერიოდში უნგრელები პოდგორიცაში ჩავლენ და მასპინძელი ჩერნოგორიის გარდა შვეიცარიას ეთამაშებიან.

ობერვარტის (ავსტრია) “ოთხთა ტურნირი”

25 ივლისი

უნგრეთი – პორტუგალია 70:76 (16:17, 19:25, 13:21, 22:13)

ავსტრია – ბულგარეთი 78:67 (15:22, 21:16, 26:19, 16:10)

26 ივლისი

ბულგარეთი – უნგრეთი 63:71 (19:13, 13:12, 17:23, 14:23)

პორტუგალია – ავსტრია 70:62 (16:15, 20:12, 13:27, 21:8)

27 ივლისი

ავსტრია – უნგრეთი 65:66 (14:8, 17:14, 19:20, 15:24)

ბულგარეთი – პორტუგალია 74:80 (26:31, 8:25, 23:14, 17:10)