მადრიდის ”რეალისა” და ესპანეთის ნაკრების გოლკიპერის, იკერ კასილიასის მეგობარი გოგო ევა გონსალესი დიდ გაურკვევლობაში აღმოჩნდა. მიუხედავად იმისა, რომ ევა და იკერი ერთმანეთს ორ წელზე მეტია, რაც ხვდებიან და ისიც ცნობილია, რომ ესპანელ გოლგიპერს ევა გონსალესის ცოლად მოყვანაც უნდა, შესაძლებელია, გონსალესმა თავისი ბედი სულ სხვა ადამიანს დაუკავშიროს. საქმე ისაა, რომ ევა გონსალესი იკერ კასილიასის გარდა კიდევ ერთ ადამიანს, ახალგაზრდა ესპანელ მსახიობ ტონინო რეიესს უყვარს. რეიესი ამას არც მალავს და საჯაროდ ისიც კი დაიქადნა, ევა მხოლოდ ჩემი ცოლი გახდება და იკერს ტყუილი იმედები ნუ ექნებაო.
ტონინო რეიესს ასეთი ქედმაღლური განცხადებების გაკეთების უფლებას ის ფაქტი აძლევს, რომ ევა გონსალესს მასთან შეხვედრაზე უარი არ უთქვამს და როგორც მსახიობი ირწმუნება, მათი პაემანი ფრიად რომანტიკული და მრავლისმომცველი იყო. ჯერჯერობით, არც ევა გონსალესი და არც ჟოზე მოურინიოს შეგირდი ამ საკითხზე კრინტს არ სძრავენ, თუმცა მათი უცნაური მდუმარება ძალიან დიდხანს რომ ვერ გაგრძელდება, ესეც ფაქტია.
ცნობისთვის, ევა გონსალესი მთელს პირენეზე ერთ-ერთ ყველაზე ლამაზ ქალად მიიჩნევა. 2003 წელს მშვენიერი ევა სრულიად ესპანეთმა დააფასა და კასილიასის გულისსწორი ”მის ესპანეთი 2003” გახდა. ასევე აღსანიშნავია ისიც, რომ ევა მრავალი სხვა ლამაზმანისაგან განსხვავებით, ინტელექტუალ გოგონადაც ითვლება და თუკი მას დავუჯერებთ, მთელი მსოფლიო ლიტერატურა აქვს გადაბულბულებული.