სუპერლიგის მონაწილე “სოხუმის” აწ უკვე ყოფილი მძიმე ფორვარდი ჯერემი საიმონსი (11.08.89, 204სმ) არაბეთის ერთ-ერთი უმდიდრეს ქვეყანაში, საუდის არაბეთში გაემგზავრა და საკალათბურთო კარიერას ამ ქვეყანაში გააგრძელებს.
ამის შესახებ “მსოფლიო სპორტს” “სოხუმის” მთავარმა მწვრთნელმა ვაჟა კვარაცხელიამ განუცხადა.
მართალია, ზღვისპირელებმა 2013-14 წლების სეზონი კარგად დაიწყეს, მაგრამ ფინანსურ კრიზისში აღმოჩნდნენ და რამდენიმე თვეა უხელფასოდ თამაშობენ. პეტერ ივანიჩისა (სერბეთი) და ჯოშუა ჯეკსონის (მალტა) შემდეგ საიმონსი (აშშ) მე-3 ლეგიონერია, რომელმაც ფინანსური პრობლემების გამო გუნდი დატოვა. არადა, არსებობის განმავლობაში “სოხუმს” ასეთი წარმატებული სეზონი არასოდეს ჰქონია. სეზონის დასაწყისში გუნდმა დუდუ დადიანის მემორიალი მოიგო, შემდეგ ზურაბ საკანდელიძე-მიხეილ ქორქიას მემორიალისა და საქართველოს თასის ფინალში ითამაშა. ახლა წინ “ქუთაისი-2010”-თან მეოთხედფინალური სერიის მატჩები ელოდება. ხელფასებზე რომ აღარაფერი ვთქვათ, კლუბს კალათბურთელთა სასტუმროში დაბინავებისა და კვების ფულიც კი არ აქვს, მაგრამ ამ სიტუაციიდან გამოსავალს ეძებს.