ვიქტორ სანიკიძის “უნიკსმა” ევროლიგაში პირველი გამარჯვება იზეიმა. მე-3 ტურში ყაზანელები იტალიურ “დინამო სასარის” დაუხვდნენ და 85:62 გაანადგურეს.

აღსანიშნავია, რომ პირველი ტაიმის შემდეგ წინ სტუმრები იყვნენ 2 ქულით, თუმცა, მე-2 ნახევარში რუსული კლუბი შეუჩერებელი იყო.

ქართველმა ფორვარდმა გამარჯვებაში სოლიდური წვლილი შეიტანა. სანიკიძე სასტარტო შემადგენლობაში არ ყოფილა, მოედანზე გატარებულ 22:21 წუთში კი 9 ქულა, 7 მოხსნა (3 შეტევაში) და 1 ჩაჭრა მოაგროვა.

“ვიკამ” 4-ვე ორქულიანი და 2-დან 1 საჯარიმო ჩააგდო, ბურთი 2-ჯერ დაკარგა, 1 პერსონალური ფოლი მიიღო, მის წინააღმდეგ კი 2-ჯერ დაჯარიმდნენ.

საინტერესოა, რომ მასპინძელთა მხრიდან 10 და მეტი ქულა ერთბაშად ექვსმა კალათბურთელმა ჩააგდო: ფიშერი (14), ზისისი (13), უაიტი (11), კაიმაკოღლუ (11), ლენგფორდი (10), ჯერელსი (10). სასარელთა ამერიკელმა ლიდერმა რაკიმ სანდერსმა 18 ქულა მიითვალა.

“უნიკსი” ევროლიგის A ჯგუფში მომდევნო მატჩს 6 ნოემბერს კაუნასში “ჟალგირისის” წინააღმდეგ ჩაატარებს.

31 ოქტომბერს კი თამაშები ელით ევროლიგაში მოასპარეზე სხვა ქართველი ლეგიონერების კლუბებს. მანუჩარ მარკოიშვილის ცსკა ზაგრების “ცედევიტას” ესტუმრება, ხოლო თორნიკე შენგელიას “ლაბორალ კუჩა” სტამბულის “გალათასარაის” მიიღებს.

სხვა საქმეა, რომ მარკოიშვილი ჯერაც ტრავმირებულია და ცსკა-ს ხორვატიაში არც გაჰყოლია.