ხვიჩა კვარაცხელია კარგ ფორმაში დაბრუნდა და სერია A-ს ბოლო სამ ტურში მოედანი უგოლოდ არ დაუტოვებია - 4 გოლი, 1 საგოლე პასი.

სტატისტიკური მონაცემების ცნობილმა გამოცემა Opta-მ „ტორინოსთან“ მატჩის შემდეგ კვარაცხელიას შესახებ რამდენიმე საინტერესო მაჩვენებელი გამოაქვეყნა:

• ხვიჩა კვარაცხელიამ ზედიზედ მეორე სეზონში მოახერხა სერია A-ში ორნიშნა რაოდენობის გოლების გატანა: გასულ სეზონში 12 გოლი, მიმდინარეში - 10 (წინ კიდევ 10 ტურია).
  
  
• ტორინოს წინააღმდეგ სერია A-ში ჩატარებულ ოთხ მატჩში ხვიჩამ ოთხ გოლში მიიღო მონაწილეობა (3 გოლი, 1 საგოლე პასი).
  
  
• ხვიჩა კვარაცხელიამ სერია A-ში ზედიზედ სამ მატჩში გოლი მეორედ გაიტანა. პირველად 2023 წლის თებერვალში „სასუოლოსთან“, „სპეციასა“ და „კრემონეზესთან“, ხოლო მიმდინარე სეზონში „სასუოლოსთან“, „იუვენტუსსა“ და „ტორინოსთან“.
  
  
• სერია A-ს მიმდინარე სეზონში „ნაპოლის“ არც ერთ ფეხბურთელს კვარაცხელიაზე მეტჯერ გოლში მონაწილეობა არ მიუღია - 14 (10 გოლი, 4 პასი). ასეთივე შედეგი აქვს ვიქტორ ოსიმენს (11 გოლი, 3 პასი).
  
  
• კვარაცხელიას გოლი „ნაპოლისთვის“ სერია A-ში 3600-ე გამოდგა, რითაც „აძური“ გახდა მე-7 გუნდი „იუვენტუსის“, „ინტერის“, „მილანის“, „რომას“, „ფიორენტინას“, და „ლაციოს“ შემდეგ, რომელმაც ამ ნიშნულს მიაღწია გოლების რაოდენობით.

შეგახსენებთ, რომ ხვიჩა კვარაცხელიას მიმდინარე სეზონში ყველა ტურნირზე ჩატარებულ 36 მატჩში 10 გოლი, 5 საგოლე პასი და 2 მოპოვებული პენალტი აქვს აქტივში. „ნაპოლი“ 44 ქულით მეშვიდეა და მომდევნო მატჩს ჩემპიონთა ლიგაზე „ბარსელონასთან“ ჩაატარებს.