„ფერარის“ შეფი სერჯო მარკიონე ამბობს, რომ მისმა გუნდმა ახალი სეზონისთვის ან საუკეთესო ავტომობილი მოამზადა, ან შეიძლება ის სულაც უბადრუკი რამ გამოდგეს. მას ასეთი შთაბეჭდილება დარჩა მას შემდეგ, რაც მარანელოს ქარხანა მოინახულა. იქ კი მეტისმეტად კარგ ხასიათზე მყოფი ტექნიკური პერსონალი დახვდა.

დეტროიტის ავტო შოუზე მყოფმა მარკიონემ „გაძეტა დელო სპორტთან“ საუბრისას განაცხადა: „მარანელოში რამდენიმე დღე გავატარე და მომეჩვენა, რომ ინჟინრები მეტისმეტად მშვიდად იყვნენ. ჩემი აზრით, ახალი სეზონისთვის ჩვენ ან ნაგავი მოვამზადეთ, ან ნამდვილი მხეცი! ჩვენ ყველაფერი გავიღეთ, რათა ზე ძლიერი მანქანა გაგვეკეთებინა. მის ნახვას 22 თებერვალს შეძლებთ, როცა წარდგენას ჩავატარებთ“.

მარკიონეს დამსახურებაა ის, რომ „ალფა რომეო“ ფორმულა 1-ს დაუბრუნდა. მილანური ბრენდი „ფერარის“ რებრენდირებული აგრეგატებით „ზაუბერს“ მოამარაგებს. გარდა ამისა, არის ლაპარაკი იმაზეც, რომ იმავე აგრეგატებს „ჰაასი“ „მაზერატის“ ბრენდით მიიღებს. მარკიონე ამბობს, რომ ფ1-ში დაბრუნება, საერთაშორისო დონეზე „ალფა რომეოს“ ცნობადობას გაზრდის.

მარკიონე „ფიატ კრაისლერის“ ხელმძღვანელის პოსტზე 2019 წლამდე იქნება და მისი დატოვების შემდეგაც, „ფერარიში“ 2021 წლამდე დარჩენას გეგმავს. კითხვაზე, მართალია თუ არა გავრცელებული ინფორმაცია იმის შესახებ, რომ „ფერარის“ ყიდვა სურს, მან კითხვითვე უპასუხა: „ვინ ავრცელებს ამ ხმებს? ეს ნონსენსია! წარმოიდგინეთ, „ფერარი“ აქციების ბაზარზე 20 მილიარდი დოლარი ღირს. ჰოდა, რა ფასად შევძლებ მის შეძენას? მე ოპტიმისტი ვარ, მაგრამ ამას ლატარეის ბილეთით თუ შევძლებ“, - ამბობს მარკიონე.