WORLDSPORT.GE წარმოგიდგენთ ახალ რუბრიკას - "ფეხბურთის ნოსტალგია". ამიერიდან მაქსიმალურად ხშირად ვეცდებით გავიხსენოთ ახლო თუ შორეული წარსულიდან დაუვიწყარი საფეხბურთო მატჩები.

ახლა, თქვენს ყურადღებას ტურინის "იუვენტუსისა" და მადრიდის "რეალის" დაპირისპირებაზე შევაჩერებთ. საუბარია, 2004-2005 წლების სეზონის ჩემპიონთა ლიგის საპასუხო მერვედფინალურ შეხვედრაზე.

პირველი თამაში "სამეფო კლუბმა" შინ ივან ელგერას გოლით 1:0 მოიგო და ტურინს ეწვია. ვარსკვლავებით გაძეძგილი "რეალის" შანსი უფრო ძვირად ფასობდა, მიუხედავად იმისა, რომ ისტორიულად უჭირდა "იუვესთან" თამაში და არც ტურინელები განიცდიდნენ დიდი ფეხბურთელების ნაკლებობას.

2005 წლის 10 მარტს, ძალიან დაძაბული მატჩის მომსწრე გახდა "დელე ალპიზე" შეკრებილი 60 ათასი და მილიონობით ტელემაყურებელი. "ბებერი ქალბატონი" უპირატესობას ფლობდა, მაგრამ ესპანური გრანდი კარის მშრალად შენახვას ახერხებდა. თუმცა, 75-ე წუთზე ზლატან იბრაჰიმოვიჩის გადაცემით დავიდ ტრეზეგემ ლამაზი გოლი გაიტანა. ფრანგის ზუსტმა დარტყმამ თამაში დამატებით დროში გადაიყვანა.

იქ კი, საინტერესო ამბები დატრიალდა: ჯერ, რონალდო და ალესიო ტაკინარდი ერთმანეთთან არასპორტული ქმედების გამო მარკუს მერკმა გასახდელის გზას გაუყენა. მერე კი, როდესაც ყველა თერთმეტრიანების სერიას ელოდებოდა, საქმეში მარსელო ზალაიეტა ჩაერთო - ურუგვაელმა 116-ე წუთზე იკერ კასილიასის კარი მეორედ აიღო და მეოთხედფინალში "ბებერი ქალბატონი" გავიდა.

"ბებერმა ქალბატონმა" იმ დღეს "გალაქტიკოსი" მართლაც დაჩაგრა. თამაშის შემდეგ იტალიელთა მარცხენა მცველმა ჯანლუკა ძამბროტამ ასეთი კომენტარიც გააკეთა: "თამაშამდე ამბობდნენ, რომ "რეალი" შემდეგ ეტაპზე გავიდოდა, მაგრამ დღეს "იუვე" იყო ნამდვილი გალაქტიკოსი"...