“მანჩესტერ იუნაიტედის” ფრანგმა ნახევარმცველმა პოლ პოგბამ ჩემპიონთა ლიგის პირველ ტურში “ბაზელთან” შეხვედრაში (3:0) ტრავმა მიიღო, რის გამოც ჟოზე მოურინიოს მე-19 წუთზე იძულებითი ცვლილების გაკეთება მოუწია.

მატჩის შემდგომ “წითელი ეშმაკების” მთავარი მწვრთნელის სიტყვები კლუბის ოფიციალურ გვერდზე დაიწერა, სადაც მოურინიო აღნიშნავს, რომ ფრანგი მოთამაშე გუნდს რამდენიმე კვირა გამოაკლდება.

“ზუსტად ვერ გეტყვით რა დრო გაუცდება პოგბას. მან მიიღო კუნთების დაზიანება და ასეთ შემთხვევაში რეაბილიტაციას რამდენიმე კვირა სჭირდება”, - თქვა მოურინიომ.

როგორც მედიკოსები ვარაუდობენ, პოგბას მინიმუმ 3 კვირა გაუცდება, ამ დროის განმავლობაში კი მანჩესტერლებს 5 თამაში აქვთ ჩასატარებელი: “ევერტონის”, “ბარტონის”, “საუთჰემპტონის”, ცსკა-სა და “კრისტალ პალასის” წინააღმდეგ.