კატალონიის "ბარსელონამ" უსმან დემბელე წარადგინა. ახალგაზრდა ფრანგის განცხადებით, იგი ბედნიერია მსოფლიოს საუკეთესო გუნდში მოხვედრით და იმედოვნებს, რომ ესპანურ გრანდში ბევრ ტიტულს მოიგებს.
"ძალიან ბედნიერი ვარ მსოფლიოს საუკეთესო კლუბში ყოფნით - "ბარსელონას" გულშემატკივარი ბავშვობიდან ვარ და მსურს აქ ბევრი ტიტული მოვიგო. იმედია, თანაგუნდელებს მალე შევეწყობი. მესისგან და სუარესიგან ძალიან ბევრი რამ უნდა ვისწავლო. რაც შეეხება ნეიმარს, არ მიმაჩნია, რომ ჩვენი შედარება სწორია. ნეი მსოფლიოს გამორჩეული ფეხბურთელია, მე კი მხოლოდ მეორე სეზონს ვატარებ პროფესიონალებში. აქ უნდა გავიზარდო", - აღნიშნა დემბელემ.
დემბელეს წარდგენა "კამპ ნოუზე" 20 ათასი გულშემატკივრის თვალწინ შედგა. სხვათა შორის, პაულინიოსი არ იყოს, ფრანგის წარდგენასაც არ ჩაუვლია მცირე ინციდენტის გარეშე. დემბელემ ბურთი ვერ აკენწლა და ბუნებრივია, სოციალურ ქსელში ამ ყველაფერს დიდი გამოხმაურებაც მოჰყვა...
შეგახსენებთ, "ბარსელონამ" დემბელეს სანაცვლოდ 105 მილიონი ევრო უკვე გაიღო და პოტენციურად ტრანსფერის საბოლოო ღირებულებამ შესაძლოა 147 მილიონს მიაღწიოს - ძირითადი თანხის 40% დორტმუნდელებს შეიძლება ბონუსების სახით სამომავლოდ დაერიცხოთ.
