"მილანის" საკუთრებაში მყოფი თავდამსხმელი ჯანლუკა ლაპადულა მომდევნო სეზონს იჯარის წესით ჯენოაში გაატარებს. აღნიშნული ინფორმაცია გენუური კლუბის ოფიციალურმა ვებგვერდმა გაავრცელა.

იტალიურ მედიაში გავრცელებული ინფორმაციით კი იჯარაში "ჯენოამ" 2 მილიონი ევრო გადაიხადა და თუ გენუელები ფეხბურთელის ასპარეზობით კმაყოფილი დარჩებიან, ჯანლუკას დატოვება 11 მილიონ ევროს სანაცვლოდ შეეძლებათ.

"როსონერიმ" ლაპადულა "პესკარადან" 2016 წელს 9 მილიონ ევროს სანაცვლოდ დაიმატა. გასულ სეზონში ფეხბურთელმა 29 მატჩი ჩაატარა, გაიტანა 8 გოლი და 4 საგოლე გადაცემა შეასრულა.