თურქეთში მიმდინარე ფუტსალის ევროპის საუნივერსიტეტო ჩემპიონატზე წარმატებით ასპარეზობენ ქართველები. კონტინენტის პირველობაზე საქართველოს ღირსებას იცავს თბილისის სახელმწიფო უნივერსიტეტის გუნდი, რომელმაც ჯგუფური ეტაპი წარმატებით დაძლია და ნახევარფინალში გავიდა.
ჯგუფში თსუ-ს მეტოქეები იყვნენ პორტუგალიის, უნგრეთის, თურქეთისა და საფრანგეთის საუნივერსიტეტო გუნდები. ჩემპიონატის გახსნით მატჩში თსუ-მა ანგარიშით 7:2 დაამარცხა მასპინძელი თურქები, ხოლო მეორე შეხვედრაში 5:2 სძლია უნგრელ გუნდს. ქართველებს სერიოზული წინააღმდეგობა შეხვდათ პორტუს უნივერსიტეტის გუნდთან, თუმცა გუნდები ერთმანეთს მშვიდობით - 4:4 ანგარიშზე დაშორდნენ, ხოლო ბოლო ტურის მატჩში თსუ-ელებმა ფრანგებს 3:0 სძლიეს და ჯგუფიდან გამსვლელი ერთადერთი - პირველი ადგილი გაინაღდეს.
ქართველების მეტოქე 14 ივლისს გამოვლინდება. თსუ-ს პორტუგალიისა და პოლონეთის უნივერსიტეტებს შორის გამარჯვებული შეხვდება ნახევარფინალში, რომელიც 16 ივლისსაა დანიშნული. აქამდე ევროუნივერსიადაზე ყველაზე მაღალი შედეგი თსუ-ს ფუტსალის გუნდს ეკუთვნის, რომელმაც 2011 წელს, ესპანეთში გამართულ ევროპირველობაზე მე-3 ადგილი დაიკავა.