რუსეთის ქალაქ კირიშიში გრძელდება საერთაშორისო საჭადრაკო ტურნირი ,,მსოფლიოს ახალგაზრდა ვარსკვლავები’’, სადაც სხვებთან ერთად 13 წლის ქართველი მოჭადრაკე ნიკოლოზ კაჭარავაც (2180) მონაწილეობს.

გათამაშდა მეექვსე ტურის პარტიები, სადაც კაჭარავა თეთრებით საბერძნეთის წარმომადგენელ ლამპროს გიანოულაკისს(2330) ეთამაშებოდა. სამწუხაროდ, კაჭარავა ზედიზედ მესამედ დამარცხდა და სატურნირო მდგომარეობა საგრძნობლად გაიუარესა.

ნიკოლოზმა თავი შეიძლება იმით ინუგეშოს, რომ მასზე სამი წლით უფროს და ბევრად უფრო მაღალი რეიტინგის მქონე მოჭადრაკეს ეთამაშებოდა.

მეშვიდე ტურში ქართველ მოჭადრაკეს მეტოქედ ასევე სამი წლით უფროსი, მაგრამ ბერძენ მოჭადრაკეზე ბევრად უფრო ძლიერი, 3.5 ქულის მქონე სერგეი ლობანოვი(რუსეთი) ეყოლება, რომლის რეიტინგი არის 2429.

ექვსი ტურის შემდეგ ნიკოლოზსს 2.0 ქულა აქვს და ორ მოჭადრაკესთან ერთად 9-11 ადგილებს ინაწილებს. 4.5-4.5 ქულით ტურნირს არამ აკოპიანი(სომხეთი) და კირილ შევჩენკო(უკრაინა) ლიდერობენ.