ინგლისის ჩემპიონატის ერთპიროვნულმა ლიდერმა ლონდონის “ჩელსიმ” ნიგერიელ ნახევარმცველ ვიქტორ მოზეს ახალი კონტრაქტი გაუფორმა. როგორც ლონდონური გუნდის ვებგვერდი ოფიციალურად იუწყება, 26 წლის ფეხბურთელი “სტემფორდ ბრიჯზე” 2021 წლის ზაფხულამდე დარჩება. ძველი ხელშეკრულება მოზესს 2019 წელს ეწურებოდა.

“ძალიან აღელვებული ვარ, რადგან ჩემთვის დიდი პატივია “ჩელსისთან” კონტრაქტის გახანგრძლივება. ახლა კი, ფოკუსირება ვარჯიშებზე უნდა მოვახდინოთ, რადგან მიმდინარე სეზონში პრემიერლიგა უნდა მოვიგოთ. მადლობა ანტონიო კონტეს, რომელიც გამუდმებით მენდობა”, - განაცხადა მოზესმა.

ვიქტორ მოზესი “ჩელსიში” 2012 წლიდან ირიცხება, თუმცა ძირითად შემადგენლობაში ადგილი მხოლოდ ამ სეზონში მოიპოვა. მთლიანობაში მისი შედეგი წელს 25 მატჩი, 4 გოლი და 3 საგოლე პასია.