ლა ლიგის 22-ე ტურის დასკვნითი შეხვედრა “იპარუაზე” გაიმართა, სადაც ადგილობრივი “ეიბარი” აუტსაიდერ “გრანადას” დაუხვდა და ოთხი უპასუხო ბურთი გაუტანა.

მასპინძლები თავიდანვე უპირატესობას ფლობდნენ და ეს ტაბლოზე სულ მალე აისახა: მე-11 წუთზე ადრიანმა პენალტი ზუსტად შეასრულა და ანგარიში გაიხსნა. ტაიმის ბოლოსკენ კი, სერხი ენრიჩმა გილერმო ოჩოა მოხდენილი მოძრაობით მოატყუა და მახვილი კუთხიდან ცარიელ კარში შეაგორა ბურთი.

მეორე ნახევარშიც არაფერი შეცვლილა და კვლავ ბასკები დომინირებდნენ. 52-ე წუთზე პედრო ლეონის მოწოდებულ კუთხურს ივან რამისის გოლი მოჰყვა, ხოლო ათ წუთში თავად ლეონმა შეაგდო და სტუმართა წვალებას წერტილი დაუსვა – 4:0.

“ეიბარი” შესანიშნავ ფორმაშია. ხოსე ლუის მენდილიბარის შეგირდებმა ზედიზედ მესამე მატჩი მოიგეს და ამ თამაშებში 11 გოლი გაიტანეს (ბოლო ორ შეხვედრაში 4-4 ბურთი შეაგდეს). ბასკები 35 ქულით მე-7 ადგილზე არიან, ხოლო “გრანადა” 13 ქულით მე-19 პოზიციას იკავებს.

ეიბარი – გრანადა 4:0 (2:0)

ეიბარი, “იპარუა”

ეიბარი (4-2-3-1): იოელი, რამისი (მ.დოს სანტოსი 68), ლეიუნი, კაპა, არბილია, დ.გარსია, ესკალანტე (რივერა 78), ადრიანი, ინუი, პ.ლეონი, ენრიჩი (პენია 81).
მწვრთნელი: ხოსე ლუის მენდილიბარი

გრანადა (5-3-2): ოჩოა, ინგასონი, გ.სილვა, ლომბანი, კუენკა, ფოლქიერი (ვაკასო 46), ა.პერეირა (სამპერი 57), აგბო, მალე, ა.რამოსი (პონსე 73), კრავეტსი.
მწვრთნელი: ლუკას ალკარაზი

გოლები: 1:0 ადრიანი (11 პენ.), 2:0 ენრიჩი (39), 3:0 რამისი (52), 4:0 პ.ლეონი (62)
გაფრთხილებები: ადრიანი, დ.გარსია – ლომბანი, აგბო
მსაჯი: მატეუ ლაოსი