საერთაშორისო საავტომობილო ფედერაციის (FIA) მიერ ჩატარებულმა კომპიუტერულმა სიმულაციამ აჩვენა, რომ ფორმულა 1-ის ახალ სეზონში, ავტომობილები ზოგ სწრაფ მოსახვევს, დაახლოებით 40 კმ/სთ-ით მეტი სიჩქარით გაივლიან, ვიდრე გასულ სეზონში.

სიჩქარის ასეთ ზრდას, საბურავების გაზრდილი ზომები და აეროდინამიკაში შეზღუდვების შემსუბუქება გამოიწვევს. გარდა ამისა, არსებობს ვარაუდი, რომ წრის გავლის დრო, 2015 წლის სეზონის დროებთან შედარებით, დაახლოებით 5 წამით მოიკლებს. სიჩქარის ზრდის პარალელურად, გამკაცრდება უსაფრთხოების მოთხოვნები ტრასებისადმი.

ავსტრალიის დიდი პრიზის ორგანიზატორებს უკვე წაუყენეს მოთხოვნები ტრეკის ზოგიერთი ადგილის გადასაკეთებლად. ფ1-ის რბოლების დირექტორის მოადგილე ლორენ მეკისის თქმით, ტრასების უმეტესობას მოდიფიკაციები დასჭირდება. და ამის თქმის საფუძველსაც, მას FIA-ს მიერ ახალი რეგლამენტის შესაბამისად ჩატარებული კომპიუტერული სიმულაციები აძლევს.

„ყველა გუნდმა გვთხოვა, რომ სიმულაციები და მათი შედეგები მიგვეწოდებინა. ჩვენ ისინი იმისთვის ჩავატარეთ რომ საკუთარი კომპიუტერული პროგრამები, ახალ რეგლამენტთან შესაბამისობაში მოგვეყვანა. ა სამუშაოს დროს, კალენდარში შემავალი ყველა ტრასა შევამოწმეთ, რამაც გვაჩვენ, რომ მოსახვევებში სიჩქარე მნიშვნელოვნად გაიზრდება. ზოგ სწრაფ მოსახვევში, სიჩქარე 40 კმ/სთ-ითაც კი მოიმატებს“, - ამბობს მეკისი.