კალათბურთი

13:52 | 30.07.2016 | ნანახია [] - ჯერ

ქართველმა 18-წლამდელებმა ალბანეთი 94:39 გაანადგურეს

55-ქულიანი გამარჯვებით დაიწყო საქართველოს 18-წლამდელთა ნაკრებმა ევროპის ჩემპიონატის B დივიზიონი. გია კაზანჯიანის, არჩილ ჟღენტისა და მიხეილ კობეშავიძის გაწვრთილ ქართველებს მეტოქედ აუტსაიდერი ალბანეთი ჰყავდათ, რომელიც მომავალ, გაცილებით ძლიერ მეტოქეებთან ბრძოლის წინ კარგ სპარინგ-პარტნიორად გამოადგათ. საქართველოს ნაკრებმა ალბანელებს ისე იოლად მოუგო, რომ მწვრთნელს ეს მატჩი კომბინაციების დასამუშავებლად, კარგ ვარჯიშად გამოადგებოდა.

საქართველოს ნაკრებში 24 წუთი არავის უთამაშია. მწვრთნელმა მოედანზე გასვლის საშუალება 12-ივე კალათბურთელს მისცა და მათ სათამაშო დრო თითქმის თანაბრად გადაუნაწილა. პირველი მეოთხედის შემდეგ ქართველები 30:12 იგებდნენ, დიდ შესვენებაზე კი 34-ქულიანი უპირატესობით გავიდენ. მატჩის ბედიც ფაქტობრივად აქ გადაწყდა, რის შემდეგაც ქართველებმა ტემპი მაინც არ დააგდეს და მეტოქეს ხელი არც სათადარიგო მოთამაშეებმა არ დააკლეს.

საბოლოოდმ 94:39 – საქართველოს ნაკრების რეკორდული გამარჯვება ევროასპარეზზე. ქართველთაგან 5 მოთამაშე ასცდა 10-ქულიან ზღვარს – ყველაზე მეტი, 17 ქულა (და 7 მოხსნა) ლევან ბაბილოძემ მიითვალა. 14 ქულა დააგროვა ლუკა ბულაშვილმა, ხოლო მატჩის ერთადერთი ორმაგი დუბლი გოგა ბითაძის ანგარიშზეა – 12 ქულა, 11 მოხსნა 19:13 წუთში.

საქართველოს ჯგუფში კიდევ 2 შეხვედრა გაიმართა. უკრაინამ 74:65 მოუგო ინგლისს, ხოლო სლოვაკეთმა 74:56 სძლია შოტლანდიას. 30 ივლისს საქართველოს ნაკრები ჯგუფის მეორე აუსაიდერ შოტლანდიას ეთამაშება. მატჩი, რომელიც თბილისის დროით 18:30 საათზე დაიწყება, გია კაზანჯიანს კიდევ ერთი კარგი ვარჯიშის ჩასატარებლად გამოადგება.

ევროპის U18 ჩემპიონატი B დივიზიონი. სკოპიე. მაკედონია. 29 ივლისი

საქართველო – ალბანეთი 94:39 (30:12, 26:10, 13:10, 25:7)

www.gbf.ge

0.114959