წარმატებით იასპარეზეს ქართველმა გოგონებმა 22-24 აპრილს რუმინეთის დედაქალაქ ბუქარესტში ჭიდაობის მსოფლიოს გაერთიანების (UWW) ეგიდით გამართულ საერთაშორისო ტურნირზე S. Rusu, Ioan W. Popovici and G. Berceanu, V. Iorga, რომელიც ჭიდაობის სამივე სახეობაში ახალგაზრდებს და ჭაბუკებს შორის გაიმართა.

ტურნირის პირველ დღეს ბრინჯაოს მედალი გულიკო არუთინიანმა (43) მოიპოვა, მეორე დღეს კი ვერცხლის მედალს თამარ ხოჯაშვილი (52) დაეუფლა.

არუთინიანმა პირველ შეხვედრაში მოლდავე იულია ტირნას 6:0 მოუგო, ნახევარფინალში რუმინელ მარია ციოკლეასთან 0:3 დამარცხდა, მესამე ადგილისათვის შეხვედრაში კი ბულგარელ ივანკა ბარუტისჩსკას იოლად – 10:0 სძლია.

თამარ ხოჯაშვილმა თავდაპირველად თურქი ედა ტკინი 40 წამში სუფთად დაამარცხა, მომდევნო წრეში უნგრელ ერიკა ბოგნარს 10:0 მოუგო, ნახევარფინალში კი ბულგარელ ვესელა ბრამჩევას დაძაბულ შეხვედრაში 16:10 სძლია და ხელის მცირე ტრამვაც მიიღო. თამარმა ფინალში მაინც იასპარეზა, გერმანელ სერენა ბოლკესთან 2:4 დამარცხდა და ვერცხლის მედალს დასჯერდა.

ახალგაზრდებში ანი ნაზარაშვილმა (51) იასპარეზა, თუმცა პირველივე შეხვედრაში დამარცხდა და შეჯიბრს გამოეთიშა.

ისიც ვთქვათ, რომ გუნდს ოთარ ტლაშაძე ხელმძღვანელობდა.

www.wrestling.ge