ჰიუსტონში მიმდინარე მსოფლიოს ჩემპიონატზე ძალოსნობაში საქართველოს ნაკრებმა პირველი სალიცენზიო ქულები მოიპოვა. საერთო ჩათვლაში 2 ქულა გიორგი ლომთაძემ შეიტანა, რომელიც ძალები 77 კილოგრამ წონით კატეგორიაში სცადა.

შეგახსენებთ, რომ ლომთაძემ C ჯგუფში 331 კგ. (149+182) დასძლია, საბოლოოდ კი, 24-ე შედეგი აჩვენა. ნაკრების მთავარი მწვრთნელის გიორგი ასანიძის თქმით, საერთო ჯამში, ჩემპიონატის დონის ფონზე, ეს ნორმალური შედეგია.

ცნობისთვის, აღნიშნულ წონაში ჩემპიონი ყაზახეთის წარმომადგენელი ნიჯატ რაჰიმოვი გახდა 372 კგ-ით (165+207), რომელმაც ჩრდილოკორეელ კიმ კვან-სონს პირადი წონით აჯობა, მე-3 ადგილზე კი ეგვიპტელი მოჰამედ იჰაბი (363 კგ.) გავიდა.

საინტერესოა, რომ ატაცის შემდეგ, ოქროს მედლის უმთავრესი კანდიდატი ჩინელი ლუ ქსიაოჯუნი იყო, რომელმაც მოძრაობა 4-კილოგრამიანი უპირატესობით მოიგო, თუმცა, აკვრაში სამივე ცდა გაუფუჭდა და შეჯიბრს გამოეთიშა.

გოგონათა ტურნირში დებიუტი ჰქონდა თათია ლორთქიფანიძეს, რომელმაც 63 კგ-დე წონით კატეგორიაში ჯამური 174 კგ. (79+95) დასძლია. სამწუხაროდ, პირველი მისვლის დროს, თათიამ ტრავმა მიიღო და საბოლოოდ, C ჯგუფში ათ მონაწილეს მე-8 ადგილი დაიკავა.

შეგახსენებთ, რომ მსოფლიო პირველობაზე კიდევ 6 ქართველი ძალოსანი იასპარეზებს: რაულ ცირეკიძე (94 კგ.), გია მაჭავარიანი (105 კგ.), გიორგი ჩხეიძე (105 კგ.), ლაშა ტალახაძე (მძიმე), ირაკლი თურმანიძე (მძიმე) და ანასტასია გოტფრიდი (მძიმე).