ფრანგული საფეხბურთო კლუბ “რეიმსის” პრეზიდენტმა ჟან-პიერ კაილომ ინტერნეტპორტალ sofoot.com-თან ინტერვიუში განაცხადა, რომ ჯაბა კანკავას შეძენამდე, საქართველოს ეროვნული გუნდის კაპიტანს ორი წელი აკვირდებოდნენ.

“მის შესახებ პირველად ორი წლის წინ გავიგე. 2013 წელს უკვე ვიცოდით, რომ კრიხოვიაკი ჩვენთან კარიერას აღარ გააგრძელებდა. კანკავას საქართველოსა და საფრანგეთის ნაკრებების მატჩში, ასევე, “დნიპროში” ჩატარებულ თამაშებში, კერძოდ “სენტ-ეტიენთან” და ფინალში “სევილიასთან” ვაკვირდებოდით. ჩვენ ვარჩიეთ, რომ გუნდში კანკავას სტილის მოთამაშე აგვეყვანა. იმედი მაქვს, რომ მის ხასიათს საკუთარ თავზე ჩვენი ოპონენტები მიმდინარე სეზონში გამოსცდიან. კრიხოვიაკისგან განსხვავებით, რომელიც ჩვენთან დაოსტატდა, ჯაბა ის მოთამაშეა, ვინც წინსვლაში უნდა დაგვეხმაროს”, – თქვა კაილომ.

“რეიმსის” პრეზიდენტი იმედოვნებს, რომ კანკავასთან დაკავშირებით იგივე არ განმეორდება, რაც ებრაელი ფეხბურთელის ათარის შემთხვევაში მოხდა:

“ჩვენ ათარის პრეცედენტი გვქონდა, რომელმაც ადაპტაცია ვერაფრით გაიარა. ამ სფეროში გამოცდილება არ გვყოფნიდა და მსგავსი შეცდომების გამეორების თავიდან ასაცილებლად, მწარე გამოცდილებას გავითვალისწინებთ. გარდა ამისა, ჯაბა რამდენიმე სიტყვას ფრანგულად უკვე საუბრობს და გვსურს, რომ ენა სწრაფად ისწავლოს”.

კაილომ აღნიშნა, რომ კანკავას მიერ კიევის “დინამოს” ფეხბურთელ ოლეგ გუსევისთვის სიცოცხლის გადარჩენის ფაქტი ტრანსფერში გადამწყვეტი არ ყოფილა, მაგრამ ამ ფაქტმა დაამტკიცა, რომ ის კარგი ადამიანია.

“რეიმსის” პრეზიდენტის თქმით, თავდაპირველად “დნიპრო” კანკავაში 1,5 მილიონ ევროზე მეტს ითხოვდა, მაგრამ საბოლოოდ ხსენებულ თანხაზე შეთანხმდნენ.