ქართველი ძიუდოისტები ევროპის ახალგაზრდულ ოლიმპიურ ფესტივალზე დღეს უმედლოდ ჩაამთავრებენ. ნათია მიქაბერიძემ (63 კგ) და გოგა ქევხიშვილმა (81 კგ) საპრიზო სამეულში მოხვედრის შანსი დილის პროგრამაში დაკარგეს.
მიქაბერიძემ მეორე წრიდან დაიწყო და აზერბაიჯანელი ნარგიზ ჰაჯიევა სამ წუთში შებოჭა. მეოთხედფინალში ჰოლანდიელ სანე ვერმერს ვაზარით უგებდა, მაგრამ ჯერ თავადაც ვაზარზე დავარდა, შემდეგ კი შებოჭვაზე მოჰყვა და რეპეშაჟში გადაერთო, სადაც შვედ იდა ერიქსონთან დამარცხდა.
გოგა ქევხიშვილი მეორე ნომრად იყო განთესილი და საქმეში მეორე წრიდან - მერვედფინალიდან ჩაერთო, მაგრამ პოლონელ მიხალ იაცკიევიჩთან დამარცხდა და ამ უკანასკნელის კიდევ ერთ მოგებას დაელოდა, თავად ბრინჯაოს შანსი რომ გახსნოდა. იაცკიევიჩი მეოთხედფინალს ვერ გასცდა და ქევხიშვილისთვის ტურნირი დასრულდა.
დღესვე ჩემპიონ-პრიზიორები გოგონებში 70 კილოგრამ წონით კატეგორიაში უნდა გამოვლინდნენ. ამ წონაში საქართველოს ნაკრებს მონაწილე არ ჰყავდა.
ფინალური ბლოკის შეხვედრები 16 საათიდან დაიწყება.
