თბილისში მიმდინარე ევროპის ახალგაზრდულ ოლიმპიურ ფესტივალზე საქართველოს ვაჟ ხელბურთელთა ნაკრები B ჯგუფის პირველ შეხვედრაში შვეიცარიელებს დაუპირისპიდა და ანგარიშით 22:28 დამარცხდა.
მასპინძლებმა მატჩი აქტიურად დაიწყეს. გარი თურქიას გუნდი მეტოქეს საშუალოდ, ორი ბურთით უგებდა, თუმცა პირველი ტაიმის ბოლო ათი წუთის განმავლობაში შვეიცარიის ნაკრებმა უშეცდომოდ ითამაშა და პირველი ნახევარი ანგარიშით 11:9 მოიგო. მეორე ტაიმში საქართველოს ნაკრებმა მდგომარეობის გამოსწორება სცადა, თუმცა შვეიცარიელები უშეცდომოდ მოქმედებდნენ და საბოლოოდ მატჩი ექვსი ბურთის სხვაობით 28:22 მოიგეს.
ამ დროისთვის B ჯგუფში შვეიცარიისა და საფრანგეთის ნაკრებებს ორ-ორი ქულა აქვთ. შვეიცარიელები ჯგუფს ბურთების უკეთესი შეფარდების წყალობით ლიდერობენ.
ქართველი ხელბურთელები მორიგ მატჩს ხვალ, 28 ივლისს, 16:00 საათზე ფრანგების წინააღმდეგ ჩაატარებენ, ხოლო შვეიცარიელები ამავე დღეს, 14:00 საათზე სლოვენიელებს დაუპირისპირდებიან.
