ბაქოს “ინტერის” ქართველმა ფორვარდმა ბაჩანა ცხადაძემ ინტერნეტპორტალ azerisport.com-თან ინტერვიუში განაცხადა, რომ სეზონის შემდეგ მთავარი მწვრთნელის კახა ცხადაძის წასვლა გუნდისთვის დიდი დანაკლისი იქნება.
- აზალ-თან მატჩის ფრედ დასრულებამ “ინტერის” საჩემპიონო ამბიციას მნიშვნელოვნად “დაარტყა”?
- ნებისმიერ შემთხვევაში ჩვენთვის ჩემპიონობისთვის ბრძოლა რთულია, მაგრამ დანებებას არ ვაპირებთ. “ყარაბაღთან” ორი მატჩი გველის. თუ საუკეთესოობა გვსურს, ქულათა მაქსიმუმი უნდა ავიღოთ.
- მატჩის მერე რა მოხდა?
-მატჩის დასასრული საკმაოდ აგრესიული აღმოჩნდა. ორივე გუნდი ხისტად თამაშობდა და წესებიც უფრო ხშირად ირღვეოდა. ნიჯატ გურბანოვს “შევეჯახე”, მაგრამ საბედნიეროდ ყველაფერი მხოლოდ შელაპარაკებით დასრულდა.
- მიზეზი რა იყო?
- მან ჩვენ ფეხბურთელს დაუყვირა და ვუთხარი, რომ ეს არ გაეკეთებინა.
- მთავარი მოვლენები მოგვიანებით განვითარდა...
- საფინალო სასტვენის შემდეგ, ყველას თვალწინ იბეკოიმ ჩვენ ფეხბურთელ სეზარ მეზა კოლის დაარტყა. პირადად არავისთვის დამირტყამს, რასაც აზალ-ის მოთამაშეები დაადასტურებენ. ნიჯატის ინტერვიუ წავიკითხე და ჩვენ შორის არაფერი მომხდარა. ის გასახდელში წავიდა.
- აზალ-ში ამბობენ, რომ “ინტერი” როდესაც ვერ იგებს, მუდმივად ასეთი კონფლიქტები ხდება...
- ეს ჩხუბი ვიდეოზეა გადაღებული. იქ ჩანს რაც მოხდა. იბეკოის კოლისთვის რომ არ დაერტყა, ყველაფერი მშვიდად დასრულდებოდა. ფეხბურთი ემოციური თამაშია და აზალ-ში მართლები არიან: როდესაც ვერ ვიგებთ ძალიან ვბრაზდებით.
- ამბობენ, რომ ჩხუბში მამათქვენიც ჩაერია?
- ის აზალ-ის მწვრთნელ ტარლან ახმედოვთან ერთად მოთამაშეებს ამშვიდებდა.
-აქამდე, აზერბაიჯანის ჩემპიონატის მატჩებში მომხდარ მსგავს კონფლიქტებში არ მონაწილეობდით?
- აზერბაიჯანში 5 წელია ვცხოვრობ. ეს ქვეყანა ძალიან მიყვარს და პატივს ვცემ. თამაშს აქ მოვუმატე და საქართველოს ნაკრებში გამომიძახეს. ბევრი მეგობარი მყავს. ასეთ “გარჩევებში” არასოდეს ვმონაწილეობდი.
- საუბრობენ, რომ კახაბერ ცხადაძესთან ერთად “ინტერიდან” თქვენც წახვალთ...
- ჩემი აზრით, მამაჩემის წასვლა “ინტერისთვის” დიდი დანაკლისი იქნება, რადგან ახლიდან რაღაცის “აშენება” რთულია. თუმცა, იმედი მაქვს, რომ ახალი მწვრთნელიც ამბიციური იქნება. “ინტერთან” კონტრაქტი 2016 წელს მეწურება და ამ კლუბში თავს კომფორტულად ვგრძნობ.
