საინტერესო ინფორმაცია გაავრცელა გუშინ გერმანულმა პრესამ. მათი მტკიცებით, მიმდინარე სეზონის დასრულების შემდეგ, "ვოლფსბურგის" ხელმძღვანელობა ბოსნიელი ფორვარდ ედინ ჯეკოს "იუვენტუსის" ბრაზილიელ ფლეიმეიკერ დიეგოში გაცვლის. აღნიშნული გარიგების შესაძლებლობა მოგვიანებით სატრანსფერო საკითხებზე მომუშავე ინტერნეტ-გამოცემა tuttomercatoweb-მაც დაადასტურა.
ჯეკო რომ გერმანულ კლუბს დიდხანს ვერ შერჩება, ამაზე ყველა ულაპარაკოდ თანხმდება. ბოსნიელის შეძენის ერთ-ერთ უმთავრეს პრეტენდენტად აქამდე "მილანი" ითვლებოდა, მაგრამ "როსონერის" მესვეურებლა ფორვარდის ფასი (40 მილიონი ევრო) გადამეტებულად მიიჩნიეს და ცოტა ხნის წინ ოფიციალურად განაცხადეს, ჯეკოს შეძენის პრეტენზია აღარ გაგვაჩნიაო.
სამაგიეროდ, "იუვენტუსი", რომელიც ძლიერი თავდამსხმელის ძიებაშია, დიდი სიამოვნებით დათანხმდება ამ გარიგებას, თუკი რა თქმა უნდა, გერმანული კლუბის ხელმძღვანელებმა არარეალური თანხის დამატება არ მოითხოვეს. თავის მხრივ, "ვოლფსბურგის" შეფებს იმედი აქვთ, რომ დიეგო, რომელსაც გერმანულ ფეხბურთში თამაშის დიდი გამოცდილება აქვს (წლების განმავლობაში იგი "ვერდერის" ლიდერი იყო), ბუნდესლიგაში დაბრუნების შემთხვევაში, კვლავ აღიდგენს ჩვეულ ფორმას.
tuttomercatoweb-ის მტკიცებით, მხარეები მოლაპარაკებას უახლოეს დღეებში დაიწყებენ.