საქართველოს ძიუდოისტთა ნაკრების მთავარმა მწვრთნელმა ამირან ტოტიკაშვილმა პრაღის მსოფლიოს თასიდან დაბრუნებისთანავე, გაფართოებული შემადგენლობა სავარჯიშოდ შეკრიბა. ნაკრების კანდიდატებით დაკომპლექტებული გუნდი ბაკურიანში გაემგზავრა, შეკრების გასავლელად. ვენაში ჩასატარებელ ევროპის ჩემპიონატისთვის (22-25 აპრილი) მოსამზადებელ ქართულ გეგმაში მხოლოდ შეკრებებიღა დარჩა. ევროტატამზე გასაყვან შვიდეულში მოსახვედრად ბრძოლას ის ძიუდოისტები აგრძელებენ, წლეულს, საერთაშორისო ტურნირებზე გამორჩეულად რომ იჭიდავეს. შიდა კონკურენციის ლიდერის ვინაობა ოფიციალურად ჯერ არც ერთ წონით კატეგორიაში არ დასახელებულა.
“საერთაშორისო ტურნირებზე ბიჭების გამოსვლით მთლიანობაში უკმაყოფილო ნამდვილად არ ვარ. ამ ეტაპზე საკმაოდ კარგად წარმოაჩინეს თავიანთი შესაძლებლობები, მაგრამ ნაკრები რომ მთლიანობაში სათანადო დონეზე არაა მზად, ესეც ცხადია. სპორტსმენები შეხვედრის ბოლომდე ვერ ძლებენ, ძლიერ იღლებიან. ამ პრობლემას სამწუხაროდ, მოკლე დროში ვერ მოვაგვარებთ. თუნდაც მარტო სუნთქვის პრობლემის მოწესრიგებას, ხანგრძლივი ვარჯიში და მკაცრი რეჟიმი სჭირდება. გამძლეობაში თითქმის მთელ ნაკრებს უჭირს. სრულყოფილად მომზადებული გუნდის ჩამოსაყალიბებლად დაახლოებით ერთწლიანი მუშაობა დამჭირდება”, - უთხრა “მსოფლიო სპორტს” ამირან ტოტიკაშვილმა.
ნაკრების თავკაცმა იქვე, ევროპის ჩემპიონატისთვის მოსამზადებელი ეტაპის დეტალებიც დააკონკრეტა:
“გეგმაში 3 შეკრება გვაქვს. ბაკურიანში გუნდი 2 კვირა დარჩება და მთელი ეს დრო ძირითადად ფიზიკურ მომზადებას დაეთმობა. შემდეგ დუშეთში გავემგზავრებით, სრულყოფილი, ტექნიკურ-ტაქტიკური შეკრების გასავლელად. დასკვნით ვარჯიშებს კი თბილისში გავმართავთ. სწორედ თბილისში დავასახელებ ევროპის ჩემპიონატზე დასაყენებელ შემადგენლობას - სავარაუდოდ, ავსტრიაში გამგზავრებამდე ერთი კვირით ადრე. ამ ეტაპზე შიდა კონკურენციის წამყვანი ძიუდოისტები ცხადია გამოკვეთილები არიან, მაგრამ შერჩევა გრძელდება და არჩევანს იმათზე შევაჩერებ, ვინც ევროპირველობის წინ მართლა საუკეთესო იქნება თავის წონაში”, - აღნიშნა ძიუდოისტთა ნაკრების მთავარმა მწვრთნელმა.
ოთარ მაღლაკელიძე