“სამეფო რბოლად” მონათლული მოთხილამურეთა შეჯიბრი 50 კილომეტრზე, რომელსაც უისტლერის ოლიმპიურმა პარკმა უმასპინძლა, ნორვეგიელი პიტერ ნორტუგის გამარჯვებით დასრულდა.
სკანდინავიელმა სპორტსმენმა, რომელსაც ვანკუვერის ოლიმპიადის ბოლო დღემდე უკვე სამი მედალი – ოქრო გუნდურ სპრინტში, ვერცხლი ესტაფეტაში და ბრინჯაო ინდივიდუალურ სპრინტში – ჰქონდა მოპოვებული, ერთხელაც გაიბრწყინა და ნორვეგიის დელეგაციას მე-9 ოქროს მედალი მოუტანა.
აღსანიშნავია, რომ რბოლის ფინიში ძალიან დაძაბული გამოდგა. საბოლოოდ, მოწინავე სამეულმა ასპარეზობა ერთწამიან მონაკვეთში დაასრულა, რაც 50 კმ-იანი ტრასისთვის უიშვიათესო მოვლენაა.
ნორვეგიელმა ჩემპიონმა გერმანელ აქსელ ტაიხმანს გუნდური სპრინტში დაჯაბვნა არ აკმარა და ამჯერად, ფინიშთან 0.3 წამით მიასწრო, ბრინჯაო კი შვედ იუჰალ ოლსონს ერგო, რომელმაც შვეიცარიელი დარიო კოლონას წაქცევით ისარგებლა და კვარცხლბეკის მე-3 საფეხურს უწია.
“50 კმ-იანი რბოლის მოგება ჩემი ბავშვობის ოცნება გახლდათ. საკუთარ თავს ფავორიტთა შორის ნამდვილად არ ვთვლიდი. დაღლილობას ვგრძნობდი და ბოლო მეტრებზე ძალიან გამიჭირდა. ფინიშის ხაზთან ნამდვილი ბრძოლა გაიმართა, სადაც გამარჯვებას ნებისმიერი ჩვენთაგანი იმსახურებდა”, - განაცხადა ნორტუგმა.